Wednesday, December 16, 2015

मेरो माया हजुरलाई

देउरालीको कसम न त, रुमाल साटी माया लाएँ !
बालपनकै रैछ साइनो, छुटेपछि चाल  पाएँ !!

चौतारीको वरलाई, सोध पूर्णिमाको जुनलाई 
नसम्झेको रात छैन, सुनाइदेउ न उनलाई 
देउराली ... 


कति डाँडा काटी गयौ, बिर्सी जाने साथी
झल्को मेरो आउछ कि नाइँ, चस्कंछ कि छाती ? 
देउराली...... 
                                                   

बनै ढाक्यो लालीगुराँस, हिमचुलिलाई हिऊंले
मेरो माया हजुरलाई, गीत गाउने नियुंले  
देउराली .... 



Wednesday, October 14, 2015

कांग्रेसीहरुलाई मेरा नौ प्रश्नहरु

शुशील ले गल्ति गरे भनि कोकोहोलो मच्चाउने कांग्रेसीलाई मेरा नौ प्रश्नहरु: 
१. बहुदलीय व्यवस्था मा बलियो प्रतिपक्ष्य चाहिदैन ? सहमतिका नाममा लुट मच्चाउन दिइरहने कि Watch Dog को भूमिका निर्बाह गर्ने? 
२. हार्ने चुनाब लड्न रामचन्द्र र देउबा तयार नभए पछि, अपमान को बिष पिउन तयार भइ चुनाबमा उठ्नु लाइ कायकर्ताबाट नै किन देश द्रोह गरे जस्तै गरी चित्रण गरिदै छ ? प्रजातान्त्रिक व्यवस्थामा चुनाब लडेर हार्नु अपराध हो ? 
३. भारतले सुशीललाइ चुनाब जिताउन Back गरेको भए उनि किन चुनाब हार्थे होलान् ?
४. के पी प्रधान मन्त्रि हुने बित्तिकै किन नाकाबन्दी खुल्दै छ ? भारत ले किन त्यति सहज रुपमा उनको जीतलाई स्वागत गर्यो र भारत भ्रमणको निम्ता दियो ? केहि छ जस्तो लाग्दैन ?
५. बीस औ वर्ष देखि उपचारको नाममा प्रत्येक महिना दिल्ली दरबार धाउने व्यक्ति को हो ? के पी को चरित्र सबैले यति चाडै बिर्से ? उनि अहिले सबै भन्दा ठूला राष्ट्रबादी ठहरिए ? उनि कति विश्वसनीय पात्र हुन् अरुलाई हैन माधब कुमार नेपाल र झलनाथ खनालालाई सोधी हेर्नुस.
६. के पी लाइ एक पटक प्रधान मन्त्रि बन्न दिनु पर्छ भन्ने लागेको हो ? त्यहि प्रक्रियालाई सहजीकरण गरिएको हो त के बिग्रिएको छ ? चुनाब नलडी हात उठाएर के पी लाइ प्रधानमन्त्री किन दिने भन्ने मात्र कुरा हो. एमालेले आजै देखि सशक्त प्रतिपक्ष्यको उपस्थिति बोध गरोस.
७. आज सम्म जो जसले इंडिया को सशक्त बिरोध गरेको नाटक गरेका छन्, (खास गरि कम्युनिस्टहरु) तिनीहरुको इंडिया संग सबै भन्दा ठूलो गठजोड भएको प्रमाणित भएको छैन र ?
८. जथाभाबी बोल्दै हिड्ने भारतीय राजदूतलाई बोलाएर गालि गर्ने हैसियत सुशीलले भन्दा बाहेक अरु कसैले राख्यो ? भारतको नजरमा सुशील कहिलेइ परेनन. उनको कार्यकाल भरि उनले भारत भ्रमण को निम्ता पाएनन्. यो निम्ता नपाउने झलनाथ पछि उनि दोश्रो नेपाली प्रधानमन्त्री हुन्.
९ भारतले सुशीललाइ जिताउन ९३ करोड दिन खोजेको भन्ने कुरा प्रमाणित गर्ने हैसियत भएको कोहि निस्कियोस. अरु केहि भन्नु छैन.

Wednesday, September 16, 2015

अनुराग

जब मैले
हामी बीच कहिल्यै मिलन नहुने दूरी देखेँ
तिम्रा अन्तै मोडिएका कदमहरु दोषी देखेँ,
तब मैले असहमतिलाई तिरस्कार देखेँ
विमतीलाई विद्रोह देखेँ
तिम्रा हरेक कदममा
खोटै खोट देखेँ
अहिले फेरी,
वषौँको शिषिरले प्रताडित र हतास मैले,
समयको ऐनामा आँफैलाई देखेँ
आफ्ना विचारलाई फगत आडम्बर देखेँ,
आदर्श मक्किएको देखेँ,
‘म’ केवल रित्तो देखेँ
मेरा बहुरुपी आवरणलाई ढोंगमात्र देखेँ
अनि,
विद्रोह गरेँ आफैँसँग,
भत्काएर हेरेँ आँफैलाई
हृदयलाई सुम्सुम्याएर हेरेँ,
साश्रु नयनको बादल पुछेर हेरेँ
तिमीलाई पुगेका चोटलाई गनेर हेरेँ
आँफुलाई एकपटका भुइँमा पछारेर हेरेँ
त्यति बेला,
मैले मात्र तिमीलाई देखेँ
वर्तमान र भविष्यको बन्धनबाट पर,
लाभ, हानी भन्दा माथि
आकांक्षा र प्राप्ति भन्दा पर
श्वेत, स्निग्ध, शुभ्र
सम्पूर्णतामा तिमीलाई हृदय भित्र देखेँ ।
कुनै दिन लाग्ला तिमीलाई पहिचान दिऊँ यस सम्बन्धको ।
भन कुन प्रिय नामले पुकार्न सकिएला हृदयलाई अर्काे ?
कहाँ राखुँ म तिमीलाई प्रत्येक स्वादु स्मृति भन्दा नजिक ?
कुनै सुशब्दले परिभाषित गर्न सक्ला र यो प्रिय अनुरागको ?
तर, चाहन्छौ भने निःशब्द नै रहू तिमी
र पनि पर्याप्त छ स्मृति यो एक जीवन जिउनका लागि

साभार: गरिमा मासिक, असोज, २०७२ 

Wednesday, August 5, 2015

सम्झना

चंचल नयन, ती घना केश रासी
ती मोहक अधरका मुस्कान रासी
सम्झेर पल पल मिलन गोधुलीको
कोरिएछ मनमै प्रतिबिम्ब तिम्रो
छुटाउने निस्सार आसार लामा
तड्पेर बित्ने ती रात लामा
उघारेर तन्द्रा अनि गीत लेखें
तिनै शब्द बीचमा तिमीलाई देखें
तिमी फेरी एक दिन यी हात समायौ
म जे छु जसो छु, त्यसैमा रमायौ
सम्हालेर खुशी मन भरि रोएँ
बिर्सेर सारा पीरहरु रोएँ